De Rust

De Rust – hierdie prentjie mooi dorpie is geleë aan die suidelike ingang na Meiringspoort (tussen die Swartberg en Kammanassie Berge) 35km oos vanaf Oudtshoorn. De Rust is in 2011 aangewys as Rapport en Kwêla se Dorp van die Jaar en was in 2024 tweede in dieselfde kompetisie. Eintlik is die dorpie, die laaste rusplek voordat Meiringspoort deur die Swartberge van ouds aangepak is. De Rust is alreeds in die twintigerjare deur CJ Langenhoven in sy boeke oor die omgewing, soos Herrie op die Tremspoor en Sonde met die Bure, bekend gestel.

Die rustige dorpie lê aan die voet van die magtige Swartberge en ‘n mens kan ure verwyl deur in die dorp rond te dwaal en in winkeltjies en kunsgalery besoek. Of by die talle eetplekke tipies Klein Karookos geniet. De Rust het asemrowende uitsigte oor die berg & valleie. In die winter lê die berge wit van die sneeu, en in die reëntyd tuimel watervalle langs die hange af.

Aktiwiteite en plekke van belang sluit in Meiringspoort en Waterval, Historiese Karoo argitektuur, Stompdrift Dam en die bekende roete:

De Rust – Meiringspoort – Prince Albert – Swartberg Pas – De Rust (via Oudtshoorn of Oudemuragie Road) waarop jy die prag van die Klein Karoo behoorlik kan verken.

Die hele dorpie is verklaar as erfenis gebied en historiese Monument. Oral kry jy egte Karoo argitektuur met Nagmaal- huisies en statige ou Victoriaanse huise met breë stoepe. Verskeie, unieke Gastehuise bied verblyf in ’n dorpie waar stilte jou omsingel! Daar is ook vir die jonges van hart  'n paar kuierplekke met musiek, goeie geselskap en lekker kos.

​